خشتەی دابەشکردنی موچەی ئەم مانگەی سەرجەم وەزارەت و فەرمانگاكانی حکومەتی هەرێمی کوردستان بڵاوکرایەوە، تا دووشەممەی داهاتوو سەرجەم وەزارەت و دەستەکان موچە وەردەگرن.
دوێنێ یەکشەممە مەسرور بارزانی، سەرۆکی حکومەتی هەرێمی کوردستان هەڵگرتنی لێبڕینی موچەی ڕاگەیاند و بەو پێیەش ئەم مانگە موچەی تەواو بەبێ لێبڕین دابەشدەکرێت، ئەمڕۆ وەزارەتی تەندروستی وەک یەکەم وەزارەت موچەی مانگی تەمموزی وەرگرت.
بەپێی ئەو خشتەیەی بڵاوکراوەتەوە، سبەینێ دیوان و لیواکانی وەزارەتی پێشمەرگە، یەكەكانی 70 و 80 و وەزارەتی ناوخۆ موچە وەردەگرن، وەزارەتی پەروەردە ڕۆژی چوارشەممە موچە وەردەگرێت.
هەروەها ڕۆژی یەکشەممەی داهاتوو موچەی خانەنشینیی پێشمەرگە و دووشەممە موچەی خانەنشینیی شارستانی دابەشدەکرێت.
