کونسوڵی گشتیی چین لە هەرێمی کوردستان لەبارەی ئەو جۆرە شامپۆ چینییەوە دوا کە لەماوەی رابردوودا، بووە هۆی گرفتی تەندروستی بۆ چەند هاوڵاتییەک لە شاری سلێمانی.
لیۆ جین یۆنگ، کونسوڵی گشتیی چین لە هەرێمی کوردستان رایگەیاند لێکۆڵینەوە لەسەر بابەتەکە دەکەن و رێکار بەرامبەر هەموو ئەو کۆمپانیا و کاڵایانەی کوالیتییان نزمە دەگرنەبەر.
ئەم قسانەی کونسوڵی گشتیی چین لە هەرێم دوای سەردانێکی بوو بۆ پارێزگای سلێمانی و کۆبوونەوەی لەگەڵ هەڤاڵ ئەبوبەکر، پارێزگاری ئەو شارەدا و دواتر گفتوگۆ لەسەر هاوتایی نێوان هەردوو شاری سلێمانی و شاری ئیووی چین و پتەوکردنی پەیوەندییە کولتوریی و ئابووریی و بازرگانییەکانی نێوانیان کرا.
ئەمەش لە کاتێکدایە، دوو رۆژ لەمەوبەر، کونسوڵخانەی چین نیگەرانی خۆی لەبارەی رووداوەکەوە راگەیاند و ئاماژەی بەوەکرد، ئامادەن هه‌ماهه‌نگی لەگەڵ لایه‌نه پەیوەندیدارەکانی حکومەتی هەرێمی کوردستان بکەن بەمەبەستی زانینی سەرچاوە و کەناڵی هاوردەکردنی ئەو بەرهەمە و زانیاری سەبارەت بە ئەنجامی پشکنینی کوالیتی.
