ماوەی زیاتر لە 30 کاتژمێرە گەنجێکی میسری لە بیرێکی قووڵ لە ناوچەیەکی بیابانی وڵاتەکەی گیری خواردووە و هەڵمەتی رزگارکردنی بەردەوامە.
میدیا عەرەبییەکان بڵاویانکردەوە، میدیاکانی میسر بڵاویانکردەوە، ماوەی زیاتر لە رۆژێکە گەنجێکی تەمەن 30 ساڵانی میسری لە ناوچە بیابانییەکانی پارێزگای ئەلمنیا لە باشووری قاهیرە کەوتووەتە بیرێکی پەراوێزخراو کە قووڵییەکەی 23 مەترە.
ئاشکراشیانکرد، رووداوەکە کاتێک روویداوە بەو ناوچەیەدا تێپەڕیوە و سەری بیرەکە بەتاڵ بووە و کەوتووەتە ناوی، هەرچەندە سەرەتا کەسە نزیکەکانی هەوڵیانداوە رزگاری بکەن، هەوڵەکانیان بێسوود بووە و لایەنە پەیوەندیدارەکانی لێئاگادارکردووەتەوە.
هەرچەندە تیمەکانی رزگارکردن دڵنیان لەوەی گەنجەکە تووشی شکاوی ئێسک بووە، بەڵام دڵنیانین لە ژیاندا ماوە یان نا، لە ئێستادا هەوڵەکان بەردەوامن بۆ دەرهێنانەوەی.
ئەم رووداوە هاوشێوەی ئەو رووداوە بوو کە دوو ساڵ لەمەوبەر بەسەر منداڵێکی مەغریبدا رۆیشت بە ناوی رەیان و بەهۆیەوە گیانیلەدەستدا.
