مەسعود ئوزێلی ئەڵمانی ئەستێرەی پشتگوێخراوی یانەی ئارسیناڵ، نزیکبووەتەوە لە پەیوەندیکردن بە یانەی فەنارباخچەی بەشدار لە خولی پلە یەکی تورکیا.
ڕۆژنامەی دەیلی مەیڵ ئاشکرایکردووە، مایکڵ ئارتێتا و بەڕێوبەرانی ئارسیناڵ هیچ هیوایەکیان بە ئوزێل نەبەخشیوە و دوای دوورخستنەوەی لە پێکهاتەکانی پریمەرلیگ و یوروپا لیگ دەرگای گواستنەوەیان بەڕوویدا کردووەتەوە.
پێشبینی دەکرێت لەم مانگەدا ئوزێل لەگەڵ یانەی فەنارباخچەی تورکی ڕێککەوتن بکات، بەپێی ڕێککەوتنەکە بۆ ماوەی سێ وەرز و نیو لە خولی تورکیا بەردەوامدەبێت، لەم نێوەندەدا یانەی ئارسیناڵ تەنها 2.2 ملیۆن پاوەند بەدەستدەهێنێت و ناچارە موچەی شەش مانگی سەرەتای یاریزانەکە بدات، کە ساڵانە 4.5 ملیۆن پاوەندە.
بەپێی سەرچاوەکە، ئەستێرەکەی گانەرز لە تورکیا بووەتە دراوسێی ڕەجەب تەیب ئاردۆغانی سەرۆکی وڵات و لە تەنیشتییەوە ڤێلایەکی بونیادناوە، هۆکارەکانی قایلبوونیشی بە یانەی فەنارباخچە بۆ ئاجون ئیلیجالی ڕۆژنامەنوسی ناوداری تورکیا دەگەڕێتەوە کە پەیوەندییەکی توندوتۆڵی لەگەڵ یاریزانەکە هەیە.
ئوزێل لە ساڵی 2013وە پەیوەندی بە ئارسیناڵەوە کردووە و هەفتانە بڕی 350 هەزار پاوەند موچە بەدەستدەهێنێت، بەرزترینە لە ناوخۆی ئارسیناڵ و خولی ئینگلیزی بە گشتی، تاوەکو ئێستا 254 یاری کردووە و 44 گۆڵی تۆمارکردووە، هەروەها ڕەخسێنەری 77 گۆڵی دیکە بووە.
