ئەمشەو، چوارشەممە ڕوبەڕوبوونەوەیەکی گرنگی قۆناغی نیوەی کۆتایی جامی ڕایەڵەی یانە ئینگلزیەکان “کاراباو کەپ” ئەنجامدرا، یانەی مانچستەر سیتی بە بردنەوەی لە مانچستەر یونایتد بلیتی یاری کۆتایی بڕی.
لە یاریگای ئۆڵدترافۆرد یانەی مانچستەر یونایتد میوانداری مانچستەر سیتی ڕکابەری مێژوویی کرد و ئەستێرەکانی گواردیۆلا بە ئەنجامی دوو گۆڵی بێوەڵام بردنەوەیان بەدەستهێنا.
گۆڵەکان لە تایمی دووەم، خولەکەکانی 50 و 83 لەلایەن جۆن ستۆنز و فێرناندۆوە تۆمارکران.
سەرەڕای ئەوەی شەیتانە سوورەکان هەوڵی زۆریاندا بە هێرشی هەڵگەڕاوەی ڕێکخراو و لە ڕێگەی تۆپی بەرزەوە ئەنجامەکە یەکسانبکەنەوە، بەڵام سەرکەوتوو نەبوون و یارییەکە بە ئەنجامی دوو گۆڵی بێوەڵام لە بەرژەوەندی شارنشینەکان کۆتاییهات.
بەپێی ئەنجامە تۆمارکراوەکە، یانەی مان سیتی بلیتی یاری کۆتایی جامی ڕایەڵەی یانە ئینگلیزییەکان “کاراباو کەپ”ی بڕی، لە یاری کۆتاییشدا ڕوبەڕوی یانەی تۆتنهام هۆتسپێرز دەبنەوە.
ڕوبەڕوبوونەوەی فاینەڵ بۆ هاندەرانی تۆپی پێی ئینگلتەرا تاموچێژێکی تایبەتی دەبێت، بەوپێیەی هەردوو ڕاهێنەر، گواردیۆلا و مۆرینیۆ جارێکی دیکە لە یاریگای ویمبڵی کێبڕکێی نێوانیان درێژە پێدەدەن.
