کۆچکردن بەرەو یۆنان رووی لە زۆربوون کردووەتەوە، بە جۆرێک بە گوێرەی ئامارێک مانگی رابردوو 400٪ رێژەی کۆچی نایاسایی بۆ ناو وڵاتەکە زیادیکردووە، بەشی زۆری ئەوانەی ئەچن هاوڵاتییانی رۆژهەڵاتی ناوەڕاستن و ژمارەی کۆچبەرە میسرییەکان بەرزە.
بڕیار وایە، کیریاکۆس میتسۆتاکیس، سەرۆک وەزیری یۆنان و بەرپرسانی باڵای یەکێتی ئەوروپا سەردانی میسر بکەن و رێککەوتنێک واژۆ بکەن کە پاکێجێکی هاوکاری تێدایە بە بڕی 8 ملیار دۆلار بۆ میسر، کە ئامانج لێی کەمکردنەوەی کۆچە.
دیمیتریس کیریدیس، وەزیری کۆچ و کۆچبەرانی یۆنان رایگەیاند، هیچ گومانێک لەوەدا نیە کە میسر زیانێکی گەورەی پێگەیشتووە بەهۆی قەیرانەکانی ناوچەکەوە. ئابووری وڵاتەکە ئەوەندە باش نەبوو و قەیرانەکانی ناوچەکەش و لێشاوی کۆچی خەڵکی ئەو ناوچانەی شەڕیان تێدایە، دۆخەکەی خراپتر کردووە.
لە دوای دەستپێکی جەنگەوە، رۆژانە ژمارەیەکی زۆر لە کۆچبەرانی میسری دەگەنە دوورگەکانی کرێت و گاڤدۆسی باشووری یۆنان و لە ساڵی 2015ەوە یۆنان دەروازەی کۆچبەران بووە لە رۆژهەڵاتی ناوەڕاست و ئەفریقا و ئاسیاوە بۆ یەکێتی ئەوروپا.
