بریکاری وەزارەتی کشتوکاڵی عێراق، رایگەیاند، بەمەبەستی کۆنتڕۆڵکردنی نرخی گۆشتی سوور، پێنج ملیار دینار بۆ پاڵپشتیکردنی بەخێوکەرانی گامێش تەرخانکرا.
مەهدی سەهەر جبوری، بریکاری وەزارەتی کشتوکاڵی عێراق، بە ئاژانسی هەواڵی عێراق (INA)ی راگەیاند، حکومەتی عێراق و وەزارەتی کستوکاڵ چەند رێوشوێن و بڕیارێکیان گرتووەتەبەر بەمەبەستی رووبەڕووبوونەوەی گرانبوونی نرخی گۆشت لە مانگی رەمەزان، لەوانەش رێگەدان بە هاوردەکردنی ئاژەڵی زیندوو بۆ مەبەستی سەربڕین و بەخێوکردنیش، ئەوە جگە لە رێگەدان بە هاوردەکردنی گۆشتی سوور.
بریکاری وەزارەتی کشتوکاڵی عێراق، وتیشی، بەگوێرەی ئەو مەرجانەی کە لەلایەن رێکخراوی تەندروستیی ئاژەڵانی جیهانییەوە دەرچوون بڕیارەکان دراون، بەتایبەتی دوای ئەو بڕیارانەی ئەم دواییە لەلایەن ئەنجومەنی وەزیران دەرکران بۆ کەمکردنەوەی باجی گومرگی بە رێژەی 50% لەسەر هاوردەکردنی ئاژەڵ لە دەرەوەی عێراق.
مەهدی سەهەر جبوری، بریکاری وەزارەتی کشتوکاڵی عێراق ئاماژەی بەوەشکرد، وەزارەت پاڵپشتیی بەخێوکەرانی ئاژەڵ بەتایبەت لە باشووری عێراق و بەخێوکەرانی گامێش دەکات، بەبڕی پێنج ملیار دینار، بەمەبەستی کڕینی خۆراک و دابەشکردنی بەخۆڕایی، هەروەها دابەشکردنی گەنمەشامی زەرد بەسەر بەخێوکەران بەگشتی لە پارێزگاکانی وڵات بە نرخی پاڵپشتیکراو.
