بەشی پێشبینیی بەڕێوەبەرایەتیی گشتیی کەشناسی و بوومەلەرزەزانیی هەرێم کەشوهەوای 48 کاتژمێری داهاتووی بڵاوکردەوە دەڵێت، “ئەمڕۆ و سبەینێ باران دەبارێت”.
کەشناسیی هەرێم لە بارەی کەشوهەوای ئەمڕۆوە دەڵێت، “ئاسمان لەنێوان نیمچە هەور و هەوری تەواو دەبێت، لە کاتەکانی دوای نیوەڕۆ لە ناوچەکانی باکوور و خۆرهەڵاتی هەرێم بەتایبەتی لە ناوچە شاخاوییەکان نمەباران و بارانی مامناوەند دەبارێت، هاوکات لە شەودا رێژەی دابارین لە سنووری پارێزگای هەڵەبجە و سلێمانی کەمێک زیاتر دەبێت و هەندێک کات لە کاتی باران هەورە تریشقەشی لەگەڵ دەبێت”.
سەبارەت بە پلەکانی گەرمیی ئەمڕۆ کەشناسیی هەرێم دەڵێت، “نزیک دەبنەوە لە تۆمارکراوەکانی دوێنێ و خێرای با مامناوەند دەبێت و لە هەندێک کاتیشدا چالاک دەبێت”.
لەبارەی کەشوهەوای سبەینێوە ئاماژە بەوە دەکات، “ئاسمان بە گشتی نیمچە هەور دەبێت و لە هەندێک ناوچە دەگۆڕێت بۆ هەوری تەواو، لە ناوچە شاخاوییە بەرزەکان ئەگەری کەمێک نمەباران هەیە، هەروەها پلەکانی گەرمی بە نزیکەی یەک بۆ سێ پلە نزمتر دەبێت بەراورد بە تۆمارکراوەکانی ئەمڕۆ”.
