بڕیارە ئەمڕۆ هاکان فیدان وەزیری دەرەوەی تورکیا بە سەرۆکایەتیی وەفدێک بگاتە شاری بەغداد و چەندین کۆبوونەوە ئەنجامبدات.
باڵیۆزخانەی عێراق لە ئەنقەرە بڵاویکردەوە، ئەمڕۆ پێنجشەممە وەفدێکی باڵای تورکیا بە سەرۆکایەتیی هاکان فیدان وەزیری دەرەوە و بە ئەندامێتی یەشار گولەر وەزیری بەرگریی نیشتمانی و ئیبراهیم کالین سەرۆکی هەواڵگری تورکیا و مونیر کارال ئۆغلو جێگری وەزیری ناوخۆ بگاتە بەغداد.
ئاشکراشیکرد، ئامانج لە هاتنی وەفدەکە ئەنجامدانی چەند کۆبوونەوەیەکە لەبارەی پرسی ئەمنی نێوان هەردوو وڵات بە ئامادەبوونی وەزیری دەرەوەی عێراق.
هاوکاری لەبوارەکانی بەرەنگاربوونەوەی تیرۆر و ئاسایشی و هاوکاریی سەربازیی بەشێکی دیکەی ئامانجی کۆبوونەوەکانی نێوان هەردوولا پێکدەهێنن.
