“نابێت بودجە بەو جۆرە تێبپەڕێندرێت”

پەرلەمانتارێك دەڵێت، “پرۆژەیاسای بودجە شكست بە وەزارەتە بەرهەمهێنەرەكان دەهێنێت و زۆربەی وەزیرەكان ئاگادارنین بودجە چییە و چی دەگوزەرێت.”

بورهان مەعموری، پەرلەمانتاری فراكسیۆنی سائیرون لە پەرلەمانی عێراق ئەمڕۆ پێنجشەممە 21ی كانونی دووەم ڕایگەیاند، “ناكرێت پرۆژەیاسای بودجەی ساڵی 2021 بەو جۆرەی ئێستای تێبپەڕێندرێت و پەسەندبكرێت.”

ناوبراو لە لێدوانێكدا وتی، “زۆربەی وەزیرەكانی حكومەتەكەی كازمی، ئاگاداری بڕگەكانی پرۆژەیاسای بودجە نین و نازانن بودجەكە چۆنە.”

بە وتەی پەرلەمانتارەكەی سائیرون، “پرۆژەیاسای بودجە دەیەوێت شكست بە وەزارەتە بەرهەمهێنەرەكان بهێنێت و بە بەرنامە كار بۆ لێدانی ئەو وەزارەتانە كراوە.”

بورهان مەعموری بە پێویستی دەزانێت پرۆژەیاسای بودجە هەمواربكرێتەوە و دەڵێت، “لیژنەی یاسایی پەرلەمان پێویستی بە 10 ڕۆژە بۆ ئەوەی دەستكاریی پرۆژەیاسای بودجە بكات و هەمواریبكاتەوە.”