پزیشکێکی پسپۆڕی هەناوی و شەکرە باس لە سوودە تەندروستییەکانی رۆژووگرتنێکی تەندروست دەکات و دەڵێت، “چەند توێژینەوەیەک ئەوەیان دەرخستووە کە بەڕۆژووبوون رێژەی چەوریە خراپەکان دائەبەزێنێت”.
د. داهات حەوێزی، پزیشکی پسپۆڕی هەناوی و شەکرە ئاماژە بە پێنج لە گرنگترین سوودە تەندروستییەکانی رۆژووگرتن دکات و دەڵێت، “رۆژووگرتنێکی تەندروست چەندین سوودی تەندروستی هەیە یەکێکیان دابەزینی کێشی لەشە، دوای هەشت کاتژمێر لە هیچ نەخواردن، گەدە بەتاڵ ئەبێت، جەستە بۆ بەدەستهێنانی وزەی پێویست پەنا دەباتەبەر ئەو گلوکۆزەی لەناو ماسولکە و جگەردایە، دوای تەواوبوونی شەکری کۆگاکراو ئینجا چەوری زیادە دەتوێتەوە و کێش دادەبەزێت”.
دەڵێت، “بەڕۆژووبوون پاک بوونەوەیە لە پاشەڕۆ و ژەهرەکان، دوورکەوتنەوە لە خواردن و خواردنەوە بۆ ماوەیەکی درێژ لەش پاک دەکاتەوە لە ژەهر و ماددە زیانبەخشەکانی جەستە، ریخۆڵەکان خاوێن دەکاتەوە و سوڕی خوێن چالاک دەکات”.
لە سوودێکی دیکەدا ئەو پزیشکە دەڵێت، “چەندین توێژینەوە ئەوەیان دەرخستووە کە بەرۆژووبوون رێژەی چەوریە خراپەکانی وەک چەوری دڵ و سەر جگەر دادەبەزێنێت و رێژەی چەوری باش بەرز دەکاتەوە، ئەوەش دەگەڕێتەوە بۆ بەکارهێنانی چەوری کۆگاکراوی ژێر پێست و سەر جگەر لەلایەن جەستەوە دوای تەواوبونی شەکری کۆگاکراو”.
ئەوەش رووندەکاتەوە کە رۆژووگرتن بەرگری لەش بەهێز دەکات و دەڵێت، “بەڕۆژووبوون ئاستی دژە ئۆکسان و دژەهەوکردنەکانی وەکو IL-1b, IL-6, tumour necrosis factor زیاد دەکات ئەمانەش کاریگەری باشیان هەیە بۆ کەمکردنەوەی مەترسی مردنی خانەکان و شێرپەنجەکان و تووشبوون بە نەخۆشی زەهایمەر و پارکینسۆن، هاوکات رۆژووگرتن ژمارەی خڕۆکە سپییەکان زیاد دەکات و خڕۆکە پیرەکان رادەماڵێت، بەوەش سیستمی بەرگری بەهێزتر دەکات”.
سەبارەت بە لایەنی دەروونی لەکاتی بەرۆژووبووندا، ئەو پزیشکە دەڵێت، “هەرچەندە لە سەرەتای بەڕۆژووبوون بەهۆی ووشکبونەوە و دابەزینی ئاستی شەکری خوێن و تێکچوونی کاتی خەو و خواردن، باری دەروونی تێک دەچێت بەڵام وردە وردە کەسی رۆژووەوان لەگەڵ ئەو بارودۆخە نوێیە رادێت، لە کۆتاییدا بەهۆی زیاد دەردانی هۆرمۆنەکانی ئیندۆرفین و سیرۆتۆنین و بەهۆی تازەبوونەوەی خانەکانی مێشک، بەڕۆژووبوونی رەمەزان کاریگەری باشی دەبێت بۆ کەمکردنەوەی خەمۆکی و سترێس و دڵەڕاوکێ، هەروەها بەرزکرنەوەی ئاستی ئاگایی و تەرکیز و رێزگرتن لە خوود، لەلایەکی دیکەوە بەڕۆژووبوون رێگایەکی کاریگەرە بۆ چارەسەری حاڵەتەکانی خووگرتن بە جگەره و هاوشێوەکانیەوە”.
