هەرچەندە زۆرینەی بەڕێوەبەرانی دامەزراوە جیاوازەکان لە جیهاندا پێیانوایە زیادکردنی کاتی کارکردن بەرهەمەکانیان زیاددەکات، بەڵام لە واقیعدا ئەمە تەواو پێچەوانەیە، لەم دواییانەدا چەندین توێژینەوە سەلماندوویانە کەمکردنەوەی کاتی کار بڕی بەرهەم و تەنانەت کوالێتییەکەشی زیاددەکات.
بەپێی توێژینەوەیەک کە سەندیکای کرێکارانی بەریتانیا لە ساڵی 2018 ئەنجامیداوە، لە بەریتانیا تێكڕای کارکردنی هەفتانە 42 کاتژمێرە، کە دوو کاتژمێری لە تێکڕای دەوڵەتانی یەکێتیی ئەوروپا زیاترە، لەگەڵ ئەوەشدا بڕی بەرهەمی لەو وڵاتانە کەمترە.
هەرچەندە چەندین توێژینەوە ئەنجامدراون بۆ دیاریکردنی کاتی نموونەیی کارکردن بەڵام شارەزایان نەیانتوانیوە بگەن بە دەرئەنجامێکی تەواو، بەشێکیان 35 کاتژمێریان لە هەفتەیەکدا دیاریکردووە، بەشێکی دیکەیان کەمتر لە 40 کاتژمێریان دیاریکردووە، لەگەڵ ئەوەشدا هەموویان کۆکن لەسەرئەوەی تا کاتی کارکردن درێژتربێت ئاستی سەرنجدانی کارمەند کەمتردەبێتەوە.
