حكومەتی عێراق قەبارەی وەبەرهێنان لە كەرتی نەوت و غازدا بۆ 17 ملیار دۆلار زیاددەكات و دەیەوێت نەوت و غازی زیاتر بەرهەمبهێنێت.
ئیسحان عەبدولجەبار، وەزیری نەوتی عێراق ڕایگەیاند، عێراق هەوڵدەدات لە ماوەی چەند ساڵی داهاتوودا بەهای وەبەرهێنان لە نەوت و غازدا بۆ 17 ملیار دۆلار بەرزبكاتەوە و وتی، ئێستا 13 ملیار دۆلارە.
بەپێی وتەی وەزیری نەوت، ئەو پارەیەی عێراق ساڵانە دەیدات بە كۆمپانیاكانی نەوت و غاز بریتییە لە 13 ملیار دۆلار، بەڵام كۆمپانیاكانیان ڕاسپاردووە پلانی وەربەرهێنانی نەوت و غاز خێراتربكەن و وەبەرهێنان لەو دوو كەرتەدا فراوانبكەن.
ئیسحان عەبدولجەبار، واژووكردنی گرێبەستی نوێی دەرهێنانی نەوت لەگەڵ كۆمپانیاكاندا ئاشكرادەكات و دەڵێت، گرێبەستی نوێ لەگەڵ گەورە وەبەرهێنەرانی وەك كۆمپانیای تۆتاڵ-دا واژووكراوە و لەگەڵ كۆمپانیای شێڤرۆن گفتوگۆدەكەن بۆ وەبەرهێنانی زیاتری نەوت لە باشووری عێراق.
