پزیشکێکی پسپۆڕی زانستی خۆراک چەند رێنماییەک بۆ دابەزاندنی کێش لە مانگی رەمەزاندا بڵادەکاتەوە.
د. کامه‌ران رەسوڵ ژاژڵه‌یی، پزیشکی پسپۆڕی زانستی خۆراک رێنماییەکانی دابەزاندنی کێش لە مانگی رەمەزاندا بەمشێوەیە دەخاتەڕوو:
1-خواردنی قاپێک زه‌ڵاته دوای رۆژوو شکاندن و پێش به‌ربانگ له‌گه‌ڵ خواردنی سه‌وزه‌ی وه‌ک خه‌یار ، کاهوو ، ترۆزی له نێوان به‌ربانگ و پارشێو ۰
2- نه‌خواردنی شیرینی ، رۆژووه‌که‌ت به میوه‌یه‌ک بشکێنه ، له بری شیرینی میوه‌یه‌کی شیرینی وه‌ک سێو ، پرته‌قاڵ ، لاله‌نگی ، کاڵه‌ک ، شووتی بخۆ، رۆژانه له یه‌ک خورما زیاتر مه‌خۆ .
3- دوور بکه‌ره‌وه لە خواردنی سارده‌مه‌نی ، خواردنه‌وه گازییه‌کان ، خواردنە خێراکان، خواردنی سووره‌وه‌کراو ، به‌ز و چه‌وری و دووگ ، پێستی مریشک.
4- رۆژانه له یه‌ک پیاڵه چه‌ره‌س زیاتر مه‌خۆ، ئه‌گه‌ر خواردت پێویسته سوێر کراو نه‌بێت و به کاڵی بێت.
5ـــ وه‌رزش کردن رۆژانه بۆ ماوه‌ی یه‌ک کاتژمێر باشترین کات پێش بانگی ئێوارەیە یان دوو کاتژمێر دوای به‌ربانگ له‌گە‌ڵ زیادکردنی جووڵه، چوون و گه‌ڕانه‌وه به پێ بۆ مزگه‌وت و کردنی نوێژی ته‌راویح سوودی زۆره.
6- دوای تێربوون یه‌کسه‌ر له سه‌ر سفره یان مێزی نان خواردن هه‌سته و بڕۆ، له قاپی بچووک خواردن بخۆ.
7- نانی تیری و هه‌ورامی به تایبه‌ت ئاردی بۆر یان جۆ بخۆ له بری نانی بازاڕ و سه‌موون و ناوساجی و ناو‌شکێنه و کولێره به‌ڕۆن بخۆ، له بری برنجی سپی، برنجی قاوه‌یی یان بۆر به‌کار بهێنه و به پڵاو لێبنرێت باشه.
8- خواردنه‌وه‌ی ده په‌رداخ یان زیاتر له ئاو له‌نێوان به‌ربانگ و پارشێو، هه‌موو نیو کاتژمێر جارێک یه‌ک په‌رداخ ئاو بخۆره‌وه.
9- دوور بکه‌وه‌ره‌وه له خواردنه‌وه‌ی شه‌ربه‌تی گیراوه و ئاماده‌کراو، له جیاتی شه‌ربه‌تی فرێش میوه‌که به ساغی بخۆ.
10- رێکخستنی کاته‌کانی نووستن، دوور بکه‌ره‌وه له شه‌ونخوونی، به رۆژ مه‌خه‌وه و به شه‌و به‌خه‌به‌ر بیت له به‌ربانگه‌وه تا پارشێو، رۆژانه یه‌ک کاتژمێر بچۆره به‌ر هه‌تاو له نێوان کاتژمێر دەی به‌یانی بۆ چواری عه‌سر.
