نەخۆشیی هەوکردنی جگەری ڤایرۆسی یەکێکە لە نەخۆشییە کوشندە گوازراوەکان، لە ئێستادا ژمارەیەکی زۆر لە خەڵكی لە سەرانسەری جیهاندا بەهۆیەوە دەناڵێنن، رێکخراوی تەندروستیی جیهانیش رۆژی 28 ی تەمموزی هەموو ساڵێکی بە رۆژی بەرەنگاربوونەوەی ئەم نەخۆشییە دەستنیشانکردووە.
بەپێی ئامارەکانی رێكخراوی تەندروستیی جیهانی لە ئێستادا نزیكەی 254 ملیۆن تووشبووی هەوكردنی ڤایرۆسی جگەر لە جۆری بی و 50 ملیۆن تووشبووی جۆری سی لە جیهاندا هەن.
هەر بەپێی ئامارەکان ساڵانە نزیكەی یەك ملیۆن و 300 هەزار كەس بەهۆی ئەو نەخۆشییەوە لەجیهاندا گیانلەدەستدەدەن، كە دەكاتە نزیكەی سێ هەزار و 500 گیان لەدەستدان لە رۆژێكدا.
بەپێی ئامارەکانی نەخۆشخانەی هەرس و جگەری فێرکاری لە سلێمانی، لە شەش مانگی یەکەمی ئەمساڵدا 400 تووشبووی نەخۆشییەکە سەردانی نەخۆشخانەکەیان کردووە، کە زۆرینەیان هەڵگری ڤایرۆسی جگەرن لە جۆری بی.
