قائیمقامیەتی سلێمانی رایدەگەیەنێت، “ئەمڕۆ لیژنە هاوبەشەکانی قائیمقامیەت هەڵمەتێکیان بۆ دووکان و بازاڕ و شوێنە گشتییەکان ئەنجامدا کە تێیدا پشکنین بۆ ئەو خواردن و خواردنەوانەی بە هاوڵاتییان و رۆژووەوانان دەفرۆشرێت کرا”.
لەوبارەیەوە ئاوات محەمەد، قائیمقامی سلێمانی ئاماژەی بەوە کردووە، “یەکێک لە ئەرکە سەرەکییەکانی پێکهێنانی لیژنەکان پاراستنی تەندروستیی گشتییە، بۆیە وەک رابردوو پێویستە لیژنەکان بەشێوەیەکی بەردەوام سەردانی دووکان و بازاڕ و شوێنە گشتییەکان بکەن بۆ پشکنینی ئەو کاڵا و شمەک و خواردەمەنییانەی لەلایەن بازرگانەکانەوە بە هاوڵاتییان دەفرۆشرێت”.
دەشڵێت، “لە کۆبوونەوەی لایەنە پەیوەندیدارەکانی تایبەت بە ئامادەکاریی بۆ مانگی رەمەزانی پیرۆز بڕیاردراوە، هەر بازرگان و دووکاندارێک بەبێ هۆکار نرخی کاڵا و شمەک بەرزبکاتەوە شوێنەکەی دادەخرێت و خاوەنەکەشی رووبەڕووی رێکاری یاسایی توند دەکرێتەوە”.
لەبارەی خشتەی کار و چالاکیەکانیانەوە قائیمقامیەتی سلێمانی ئاماژە بەوە دەکاتە، خشتەکە بە شێوەیەک رێکخراوە بەردوام چەند لیژنەیەک لە بازاڕدا پشکنین بۆ ئەو خواردن و خواردنەوانە ئەنجام دەدەن کە لەم مانگە پیرۆزدا خواستی زۆریان لەسەرە.
