کەشناسیی هەرێم بڵاویکردەوە، ئەمڕۆ و سبەی کەشوهەوای ناوچەکانی هەرێمی کوردستان سەقامگیر دەبێت و ئاسمان لە نێوان نیمچەهەور و هەوری تەواودا دەبێت.
بە گوێرەی راگەیەندراوێکی بەڕێوەبەرایەتی گشتیی کەشناسیی هەرێم، ئەمڕۆ هەینی ئاسمان لە نێوان نیمچە هەور و هەوری تەواو دەبێت، نمە بارانی کەم دەبارێت لەناوچە جیاجیاکانی هەرێم بە تایبەت ناوچە شاخاوییەکانی پارێزگای دهۆک و ئەگەری بارینی کەمێک بەفر لەناوچە شاخاوییە سنووریەکانی هەرێم هەیە.
لەبارەی کەشوهەوای سبەی شەممەوە ئاماژەی بەوەشکردووە، ئاسمان نیمچە هەور دەبێت لە هەندێک کات و ناوچە دەگۆڕێت بۆ هەوری تەواو، ئەگەری نمەبارانێکی کەم هەیە لەناوچە شاخاویەکان .
بە گوێرەی راگەیەندراوی دەستەی کەشناسیی عێراقیش، تا رۆژی دووشەممە کەشوهەوا سەقامگیردەبێت و لەو رۆژەدا، پلەکانی گەرمی دادەبەزن و رۆژی سێشەممە ئەگەری بارینی نمەباران دەبێت.
