وەزارەتی كارەبای هەرێم رایدەگەیەنێت، بەهۆی راگرتنی بەرهەمهێنانی نەوت لە هەردوو كێڵگەی گەرمیان و خۆرمەڵە 330 مێگاوات كارەبا كەمیكرد.
ئومێد ئەحمەد وتەبێژی وەزارەتی كارەبای هەرێم رایگەیاند، بڕیارەكەی دادگای پاریس بووە هۆی راگرتنی بەرهەمهێنانی نەوت لەچەند كێڵگەیەكی كوردستان و بەهۆیەوە بەرهەمهێنانی كارەبا كەمیكرد و لەئێستاشدا لە وێستگەی كارەبا لە گەرمیان كە بەغازی كێڵگەی نەوتی حەسیرە كارەبا بەرهەمدەهێنێت 80 مێگاوات كارەبا كەمیكردووە و لە وێستگەی خۆرمەڵەش لە هەولێر بە بڕی 250 مێگاوات كارەبا كەمیكردووە، بەمەش 330 مێگاوات لە تۆڕی كارەبای نیشتمانی كەمیكردووە.
لە راگەیەندراوەكەی وەزارەتی كارەبادا هاتووە، كە وەزارەت لەهەوڵدایە بەپشتبەستن بە كارەبای هایدرۆپاوەری هەردوو بەنداوی دوكان و دەربەندیخان و وێستگەكانی غازی سلێمانی و هەولێر قەرەبووی ئەو كەمبوونەوەیە بكاتەوە.
