لیژنەی گواستنەوە و پەیوەندییەكانی ئەنجومەنی نوێنەرانی عێراق داوای لە باڵیۆزی توركیا لە عێراق كرد كە گەمارۆی سەر فڕۆكەخانەی سلێمانی لاببرێت و ئەندامێكی ئەنجومەنی نوێنەرانیش دەڵێت، “پەیوەندییەكانی نێوان عێراق و توركیا پێویستە و دەكرێت لەرێگای گفتوگۆوە كێشەكان چارەسەربكرێن”.
كاروان یاروەیس ئەندامی لیژنەی گواستنەوە و پەیوەندییەكانی ئەنجومەنی نوێنەرانی عێراق بە راگەیاند، ” لە كۆبوونەوەی لیژنەكەمان لەگەڵ باڵیۆزی توركیا، سەرۆكی لیژنەكە داوای لە باڵیۆزی توركیا كرد كە گەمارۆی سەر فڕۆكەخانەی سلێمانی لاببرێت، هەروەها سەرۆكی لیژنەكە ئاماژەی بەوەشداوە كە فڕۆكەخانەی سلێمانی هیچ گرفتێكی تەكنیكی و كارگێڕی نییە و هیچ هۆكارێك نییە تا ئەو گەمارۆیە بەردەوامبێت”.
وتیشی، “داوام لە باڵیۆزی توركیا كرد گەمارۆی سەر فڕۆكەخانەی نێودەوڵەتی سلێمانی هەڵبگرێت، لەئێستاشدا باڵیۆزی توركیا لە عێراق دەتوانێت لەگەڵ حكومەتی وڵاتەكەی قسەبكات و گەمارۆكە لاببەن، چونكە ئەوەی لە گەمارۆی سەر گەشتەكانی فڕۆكەخانەی سلێمانی زیانی بەردەكەوێت، تەنها هاوڵاتییان و بازرگانانن”.
