بافڵ جەلال تاڵەبانی، سەرۆکی یەکێتیی نیشتمانیی کوردستان لەدرێژەی کۆبوونەوەکانیدا لەگەڵ سەرکردە، نێردەی وڵاتان و کەسایەتییە سیاسییەکان لە پەراوێزی بەشداریكردن لە کۆنفڕانسی ئاسایشی میونشن، لەگەڵ سیناتۆر جۆ لیبرمان، سیناتۆری پێشووی ئەمریکا، هاوسۆزی گەلی کورد و دۆستی دێرینی سەرۆک مام جەلال کۆبووەوە.
لە کۆبوونەوەکەدا هەڵسەنگاندن بۆ گۆڕانکارییە سیاسی، ئابوری، ئەمنییەکان و پرسی کورد لە ناوچەکە کرا و جەخت لە پاراستنی بەرژەوەندییە هاوبەش و نیشتمانییەكان كرایەوە لەنێوان وڵاتانی ناوچەكە.
سەرۆکی یەکێتی درێژەدان بە سیاسەتی حەكیمانەی سەرۆک مام جەلالی دووپاتكردەوە بۆ چارەسەری ئاشتییانەی كێشەكان و وتی، “هەوڵی ئێمە بۆ بونیادنانی داهاتوویەكی گەشتر و سەقامگیرترە، دیالۆگ و گفتوگۆی بونیادنەرانەش هۆکاری بەدیهێنانی ئەم ئامانجە باڵایەیە”.
لەبەرامبەردا سیناتۆر جۆ لیبرمان رۆڵی سەرۆک مام جەلالی لە بونیادنانی عێراقی نوێ و ئاسایش و ئارامی لە ناوچەکە بەرز نرخاند، هەروەها ستایشی رۆڵی سەرۆکی یەکێتی کرد كە سیاسەتێكی تەندروست و هاوسەنگ پەیڕەو دەكات و وتی، “هەنگاوەكانتان مایەی خۆشحاڵیی ئێمەیە و بەدڵنیاییەوە عێراق و هەرێمی كوردستانیش پێویستی بەو سیاسەتەیە”.
