شەوی ڕابردوو چەند چەکدارێکی داعش پەلاماری گوندی لهێبان-یان داوە بەمەبەستی هاتنە ناوەوەی ئەو گوندە، بەڵام لەلایەن دانیشتووانی گوندەکەوە تێکشکێنراون.
لە لێدوانێکدا بۆ تۆڕی میدیایی ئێستا، ڕەمەزان عوسمان لێپرسراوی کۆمیتەی سەرگەڕانی یەکێتیی نیشتمانیی کوردستان ڕایگەیاند، ژمارەیەک چەکداری داعش پەلاماری گوندی لێهبان-یان داوە، بەڵام دوای دوو کاتژمێر ڕووبەڕووبوونەوەیان لەلایەن دانیشتووانی گوندەکەوە، هێرشی چەکدارەكان تێکشکێنراوە و ڕێگرییان لێکراوە بچنە ناو گوندەکە.
گوندی لێهبان دەکەوێتە دامێنی چیای قەرەچووغ، کە لە بۆشایی نێوان پێشمەرگە و هێزە عێراقییەکاندایە، بەرپرسەکەی یەکێتی لەو سنوورە ئاماژەی بۆ ئەوەکرد، کە لەم مانگەدا ئەوە سێیەم هەوڵی چەکدارانی داعشە بۆ چوونە ناوەوەی گوندەکە، هۆکارەکەشی بۆئەوە دەگەڕێتەوە بە داگیرکردنی گوندەکە چەکدارانی داعش دەکەونە نێوان هێزەکانی پێشمەرگە و هێزە عێراقییەکانەوە.
