بە گوێرەی خشتەی کاری ئەنجومەنی نوێنەرانی عێراق ئەمڕۆ شەممە ئەنجومەنەکە دانیشتنێکی راوێژکاریی بۆ گفتوگۆ لەسەر هێرشەکان بۆ سەر سەروەریی عێراق ئەنجامدەدات.
دانیشتنەکە لە کاتژمێر 5:00ی ئێوارەی ئەمڕۆ بەڕێوەدەچێت.
دۆخی عێراق لەماوەی رابردوودا رووی لە ئاڵۆزی کردووە، هێرشە موشەکی و درۆنییەکان لەناوخۆی عێراق روویان لە زیادبوون کردووە، شه‌وی 7ی شوبات هێرشێک لە بەغدا ئەنجامدرا و ئۆتۆمبێلێک بە ئامانجگیرا و سێ کەسی تێدا کوژرا.
هێرشەکە کاردانەوەی بەدوای خۆیدا هێنا، وتەبێژی هێزە چەکدارەکانی عێراق رایگەیاند، هێزەکانی هاوپەیمانیی نێودەوڵەتیی بوونەتە هۆی نائارامیی لە عێراقدا، ئەمەش هانی حکومەت دەدات لە هەر کاتێک زیاتر کار بۆ کۆتاییهێنان بەو هاوپەیمانێتییە بکەن.
شانەی راگەیاندنی ئەمنیی عێراق بڵاویکردەوە، هێرشەکەی ئەمریکییەکان کە کرایە سەر ئۆتۆمبێلێک لە بەغدا، دوژمنکاری بوو، پێشێلکاری ئاشکرای خاکی عێراقیش بوو.
محەمەد شیاع سودانی سەرۆک وەزیرانی عێراق چەندین جار دووپاتیکردووەتەوە، کاردەکەن بۆ چوونەدەرەوەی هێزەکانی هاوپەیمانی نێودەوڵەتی لە عێراق.
