بە گوێرەی ئاماری رێکخراوی CPT، لە ساڵی 2023دا تورکیا و ئێران 1649 هێرشیان بۆ سەر خاکی هەرێمی کوردستان ئەنجامداوە، بەهۆیانەوە 24 هاوڵاتیی مەدەنی بوونەتە قوربانی کە 11 کەسیان گیانیان لەدەستداوە و 13 کەسیان برینداربوون.
کامەران عوسمان لێپرسراوی بەشی مافی مرۆڤ لە CPT یاخود تیمەکانی کۆمەڵگەی ئاشتیخوازی بە تۆڕی میدیایی ئێستای راگەیاند، لە ساڵی 2023دا 24 هاوڵاتی مەدەنیی بەهۆی هێرشەکانی تورکیا و ئێرانەوە لە هەرێمی کوردستان بوونەتە قوربانی کە زۆرینەی هێرشەکان کە 1548 هێرش بووە لەلایەن تورکیاوە ئەنجامدراوە و 101 هێرشیش لەلایەن ئێرانەوە کراوەتە سەر هەرێمی کوردستان.
کامەران عوسمان وردەکاری زیاتری خستەڕوو و رایگەیاند، زۆرینەی بۆردومانەکان فڕۆکەی جەنگی بوون و ژمارەیان 1159 هێرش بووە، 228 جار بە فڕۆکەی بێفڕۆکەوان بۆردوومانکردن تۆمارکراوە، هێلیکۆپتەر و تۆپباران و تەقەکردیش هەبوون.
بە گوێرەی ئامارەکان، ناوچەکانی پارێزگای سلێمانی و هەولێر و دهۆک و سنوری پارێزگای نەینەواش (شنگال و گوندی خازلیە) بۆردوومان کراون، بەهۆی بۆردوومانەکانەوە، 161 گوندی ناوچە سنورییەکان چۆڵکراون لە 2023دا، زیاتر لە 600 گوندی دیکەش مەترسی چۆڵبوونیان لەسەرە.
لەماوەی 9 ساڵی رابردوودا، بە گوێرەی ئاماری رێکخراوی CPT کە لە 2015 بۆ 2024 تۆمارکراوە 150 هاوڵاتیی مەدەنی گیانیان لەدەستداوە و 228 کەسیش برینداربوون.
