بەپێی ئاماری رێكخراوێك ساڵی رابردوو 164 پێشێلكاری بەرامبەر رۆژنامەنووسان تۆماركراوە و زۆرترینی لە هەولێر بووە بە 78 پێشێلكاری.
رێكخراوی پەیامنێران بۆ ماف و گەشەپێدان لە راپۆرتێكدا ئاماری پێشێلكارییەكانی بەرامبەر رۆژنامەنووسان لە شارە جیاجیاكانی هەرێم لەماوەی ساڵی 2023دا بڵاوكردەوە.
بەپێی ئامارەكە لە هەولێر 78 پێشێلكاری بەرامبەر رۆژنامەنووسان كراوە لە جۆرەكانی (دەستگیركردن، رێگەنەدان بە رووماڵكردن، هێرش و سووكایەتی و دەستبەسەراگرتنی كەلوپەلی رۆژنامەنووسی). ژمارەیەك لەو پێشێلكارییانە بەرامبەر تیمی تۆڕی میدیایی ئێستا ئەنجامدراون و رێكخراوەكە وردەكارییەكەی ئاماژەپێداوە.
لە بەرامبەردا لە سلێمانی تەنها 11 پێشێلكاری تۆماركراوە كە (دەستگیركردن، رێگەنەدان بە رووماڵكردن و تۆماركردنی سكاڵا بەرامبەر رۆژنامەنووس) لە خۆدەگرێن.
لە دهۆك 37 پێشێلكاری و لە هەڵەبجەش 10 پێشێلكاری تۆماركراون.
رێكخراوەكە كۆی پێشێلكارییەكانی ساڵی رابردووی بە 164 حاڵەت تۆماركردووە.
