بەپێی نووسراوێکی پارێزگاری بەوەکالەت بڕیارە ئەمڕۆ ئەنجومەنی نوێی پارێزگای كەركوك یەکەمین کۆبوونەوە خۆی ئەنجامبدات، بەڵام پێشبینیدەکرێت بەهۆی ئامادەنەبوونی فراکسیۆنە تورکمان و عەرەبەکانەوە کۆبوونەوەکە ئەنجامنەدرێت.
پێشتر بڕیاربوو یەكەمین كۆبوونەوەی ئەنجومەنی نوێی پارێزگای كەركوك لە 1ی شوبات ئەنجامبدرێت، بەڵام لەسەر داوای راكان جبوری، پارێزگاری بەوەكالەتی كەركوك كۆبوونەوەكە دواخرا.
فراکسیۆنە تورکمان و عەرەبەکان رایانگەیاندبوو، بەهۆی رێكنەكەوتنی سیاسی لەسەر پۆستەكانی پارێزگای كەركوك، بایكۆتی دانیشتنی ئەمڕۆی ئەنجومەنی پارێزگا دەكەن.
بۆ تەواوکردنی رێژەی یاسایی ئامادەبووان، ئەنجومەنی پارێزگای كەركوك پێویستی بە ئامادەبوونی نۆ ئەندام هەیە لە کۆی 16 ئەندام، بەڵام بەهۆی ئەوەی کورد تەنها حەوت کورسی هەیە و مەسیحییەکانیش یەک کورسی رێژەی یاسایی تەواوناکرێت.
