پۆلیسی ئەمریکا رایگەیاند، موشەکێکی بێهێز لەو جۆرەی کە بۆ هەڵگرتنی کڵاوەی ئەتۆمی بەکارهاتووە لە جەنگی سارددا، لە گەراجی ماڵی دانیشتوویەکی کۆچکردووی ویلایەتی واشنتۆن دۆزرایەوە.
ئاژانسی هەواڵی فڕانس پرێس هەواڵەکەی بڵاوکردووەتەوە و دەڵێت، “مۆزەخانەیەکی هێزی ئاسمانی لە شاری دەیتۆن لە ویلایەتی ئۆهایۆ ئێوارەی چوارشەممە پەیوەندییان پێوەکراوە بۆ ئەوەی ئۆفەرێکیان بۆ بەخشینی ئەو پارچە کۆنە سەربازییە پێ رابگەیەنن، کە دراوسێیەکی وتویەتی لە کڕین و فرۆشتنی خانووبەرەدا مامەڵەی پێوەکراوە.”
تیمی بۆمب و تەقەمەنی لێکۆڵینەوەو و پشکنینیان بۆ ئەو شتە ژەنگاوییە کرد و بۆیان دەرکەوت کە مووشەکێکی Douglas Air-2 Genie (پێشتر ناوی MB-1 بوو)، کە مووشەکێکی ئاسمانییە بۆ هەڵگرتنی کڵاوەی ئەتۆمی دروستکراوە.
پۆلیس باسی لەوەکردووە، “بەهۆی ئەوەی ئەو مووشەکە ناچالاک بووە و سوپا داوای گەڕانەوەی نەکردووە، پۆلیس لای دراوسێیەکی بەجێهێشتووە بۆ ئەوەی بیگەڕێنێتەوە بۆ مۆزەخانە.”
بە گوێرەی مۆزەخانەی هێزی فڕۆکەوانیی، ئەو جۆرە مووشەکە لەلایەن کەنەدا و ئەمریکاوە لە سەردەمی جەنگی سارددا بەکارهاتوون لە دژی یەکێتی سۆڤیەت.
