بەشیر حەداد: دەبێت هەرێم بیر لە خۆژیاندن بكاتەوە

جێگری پێشووی سەرۆكی ئەنجومەنی نوێنەرانی عێراق بێهیوایی خۆی لە بەرامبەر گفتوگۆكانی نێوان هەرێمی كوردستان و حكومەتی عێراق دەردەبڕێت و دەڵێت، “كاتی ئەوە هاتووە كە هەرێمی كوردستان دەستبكات بە رێكخستنەوەی داهاتی ناوخۆ و زیادكردنی باج لەسەر سەرمایەداران و كەمكردنەوەی خەرجییەكانی بەڕێوەبردنی بۆ ئەوەی بەرەو خۆژیاندنی ئابوری هەنگاوبنێت”.

بەشیر حەداد كە قسەی بۆ دەنگی ئەمریكا كردووە وتیشی، “دەبێت راشكاوانە ئەو سەرمایەدار و بەرپرس و وەبەرهێنەرانە دەستنیشان بكرێن و بەشێك لەو سامانانەی لە سایەی حكومەتی هەرێم كۆیان كردووەتەوە بیخەنە خەزێنەی حكومەتەوە، تا حكومەت بتوانێت بۆ ماوەی چەند مانگێك كاروبارەكانی راپەڕێنێت و چونكە بەڕاستی من نائومێدم و دەبێت كورد خەمێك لە خۆی بخوات، ناكۆكیی لایەنەكان وەلاوە بنرێت و ریزەكانی یەكبخاتەوە و دواتر هەوڵبدرێت داهاتی ناوخۆ بەڕاستی و دروستی بخرێتە خەزێنەی گشتییەوە.”