وەزارەتی گەنجینەی ئەمریکا بانکی هودای عێراقی خستە لیستی سزاکانەوە بەهۆی ئەوەی بەشداری کردووە لە پارەدارکردنی تیرۆر.
ئەمڕۆ دووشەممە، وەزارەتی گەنجینەی ئەمریکا بەهۆکاری خراپ بەکارهێنانی دارایی و ساختەکاران و سپیکردنەوەی پارە، بانکی هودا کە بانکێکی عێراقییە و بە قسەی وەزارەتەکەی ئەمریکا “وەک رێڕەوێک بۆ پارەدارکردنی تیرۆر و لە پێناو سوپای پاسدارانی ئێران کاری کردووە”، خستە لیستی سزاکانەوە.
هاوکات، جگە لە بانکەکە، خاوەنی بانکەکەشی رووبەڕووی سزا کردووەتەوە، فەرمانگەی کۆنترۆڵکردنی سەروەت و سامانی بیانی لە وەزارەتەکە سزای بەسەر خاوەنی بانکەکەدا سەپاندووە.
لە راگەیەندراوەکەی ئەمڕۆی وەزارەتەکەدا ئاماژە بەوەشکراوە، ئەو کارانەی ئەم بانکە کردوونی مەترسی لەسەر سەقامگیری عێراق و ژیانی هاوڵاتیانی ئەمریکی و عێراق دروست دەکات. دەشڵێت، “گەنجینەی ئەمریکا پابەندە بە کارە هاوبەشە درێژخایەنەکانی لەگەڵ حکومەتی عێراق بۆ بەهێزکردنی ئابووری عێراق و پاراستنی هەردوو سیستەمی دارایی ئەمریکا و عێراق لە خراپ بەکارهێنان.”
ئەمەش لە کاتێکدایە، 22ی ئەم مانگە فەرمانگەی کۆنتڕۆڵکردنی سەروەت و سامانی دەرەکی سەر بە وەزارەتی گەنجینەی ئەمەریکا، هێڵی ئاسمانی عێراقی “فلای بەغداد” و بەڕێوەبەرەکەی خستە لیستی سزاکانەوە بەهۆی تۆمەتبارکردنی بە پاڵپشتیکردنی ئێران و گروپەکانی هاوکاری ئێران لە وڵاتانی عێراق، سوریا، ئێران و لوبنان.
