سەرۆکی لیژنەی پەیوەندییەکانی دەرەوەی ئەنجومەنی پیرانی ئەمریکا پشتیوانی خۆی بۆ بڕیاری فرۆشتنی فڕۆکەی ئێف-16 بە تورکیا راگەیاند.
بێن کاردین، سەرۆکی لیژنەی پەیوەندییەکانی دەرەوەی ئەنجومەنی پیرانی ئەمریکا لە لێدوانێکیدا بۆ رۆژنامەی زە هیڵ رایگەیاندووە، رێگە بە فرۆشتنی فڕۆکەی ئێف-16 دەدات کە لەلایەن کۆمپانیای لۆکهید مارتنەوە بەرهەم هێنراوە بە تورکیا، دوای ئەوەی ئەنقەرە رەزامەندی لەسەر بەئەندامبوونی سوید لە ناتۆ دەربڕی.
ئەوەشی خستووەتەڕوو، “پەسەندکردنی داوای تورکیا بۆ کڕینی فڕۆکەی ئێف-16 بەرامبەر مەرجی پەسەندکردنی سوید بوو لە ناتۆ لەلایەن تورکیاوە”.
تورکیا بۆ ماوەی زیاتر لە ساڵێک رێگری لە بەئەندامبوونی سوید لە ناتۆ کرد و فشاری دەخستەسەر ئەمریکا بۆ نەهێشتنی ئەو رێگریانەی لەلایەن بۆب مێنێندێز، سەرۆکی پێشووی لیژنەی پەیوەندییەکانی دەرەوەی ئەنجومەنی پیران بەسەر ئەنقەرەدا سەپێندرابوون و رێگری فرۆشتنی فڕۆکەی ئێف-16ی دەکرد بەو وڵاتە.
پێشتر تورکیا داواکارییەکی پێشکەش بە ئەمریکا کردبوو بۆ بەدەستهێنانی 40 فڕۆکەی جەنگی ئێف-16 کە لەلایەن کۆمپانیای لۆکهید مارتن بەرهەم هێنراون لەگەڵ نزیکەی 80 ئامێری نوێکردنەوە بۆ ئەو فڕۆکانەی ئێستا بەکاریاندەهێنێت.
