بەڕێوەبەری هاتوچۆی سلێمانی دەڵێت، خێرایی لەنزیك كامێرا جێگیرەكان دیاریكراوە و لەهەر شوێنێك تابلۆی ئاگاداركردنەوە نەبێت، دەست بە دانانی دەكەن.
ئاسۆ محەمەد، بەڕێوەبەری هاتوچۆی سلێمانی ئەمڕۆ بە تۆڕی میدیایی ئێستای راگەیاند، لە كاتژمێر 10ی رۆژی سێشەممە 23ی كانونی دووەمەوە كامێرا جێگیرەكانی ناو شاری سلێمانی، هاوشێوەی پێشوو دەست بە تۆماركردن دەكەن.
وتیشی، “كامێراكان ئاسایی و یەك پۆینتن”.
سەبارەت بە خێرایی دیاریكراویش ئاسۆ محەمەد ئەوەی خستەڕوو، خێرایی بەپێی ئەو رێنماییە دەبێت كە لە پاڵ یان نزیك كامێراكاندا دانراوە. روونیشیكردەوە، هەر كامێرایەكیش لە تەنیشیتیەوە دیارینەكرابێت، لەمڕۆوە ئەندازەی هاتوچۆ ئاگاداردەكەنەوە بۆ دانانی تابلۆی تایبەت بە ئەوپەڕی خێرایی دیاریكراو.
دەربارەی ئەوەی ئایا ئەو كامێرایانەی لەسەر رێگای تاسڵوجە-دوكان جێگیركراون كاردەكەن، بەڕێوەبەری هاتوچۆی سلێمانی بە بەڵێ وەڵامیدایەوە.
