ساڵی رابردوو زۆرترین بومەلەرزە لەسەر ئاستی عێراق لە سلێمانی روویداوە

لە ساڵی 2023دا 142 بومەلەرزە لە عێراق روویانداوە، زۆرترینیش لە سلێمانی بووە و 31 بومەلەرزە تۆماركراوە.

دەستەی كەشوهەوای عێراق رایگەیاند، سەرجەم ئەو بومەلەرزانەی لەلایەن تۆڕی تۆماری بومەلەرزەی عێراقی لە ساڵی 2023دا تۆماركراون، 311 بومەلەرزە بووە كە گوڕەكانیان لەنێوان (1 تا 5) پلە بووە و، لە قوڵایی (2-34) كیلۆمەتر.

ئاشكراشیكرد، لەو ژمارەیە 142 بومەلەرزەیان لە ناوخۆی عێراقدا روویداوە، 115یان لەناو ئێران، 29 لە توركیا، هەشت لە سوریا، 16 لەسەر سنووری عێراق-ئێران و یەك بومەلەرزە لەسەر سنووری عێراق-توركیا بووە.

چالاكیی بومەلەرزە بەشێوەیەكی روون لە ناوچەكانی باكوور و باكووری رۆژهەڵاتە بە دیاریكراوی لە نزیك شریتی سنووری عێراق-ئێران لە ناوچەكانی باشوور و باشووری رۆژهەڵاتی دەربەندیخان، رۆژهەڵاتی كەلار، خانەقین، مەندەلی، بەدرە، نەینەوا، كەركوك، دهۆك و هەولێر.

دەستەی كەشوهەوا روونیشیكردەوە، پارێزگای سلێمانی لە پێشەنگدایە لە ژمارەی بومەلەرزەكانی ساڵی رابردوو بە تۆماركردنی 31 بومەلەرزە، بەدوایدا دیالە 23، نەینەوا 20، میسان 14، كەركوك 13، دهۆك 12 و هەولێر 11 بومەلەرزە.