ئەمینداری گشتیی یەکگرتووی ئیسلامی کوردستان رایگەیاند، بڕیارەکانی ئەمڕۆی دادگای فیدڕاڵی جێگەی دڵخۆشییە، چونکە رێگرتنە لە ستەم چ لە لایەن بەغدادەوە بێت یاخود لە هەولێرەوە.
سەڵاحەدین بەهادین ئەمینداری گشتیی یەکگرتووی ئیسلامی کوردستان پەیامێکی لەسەر بڕیارەکەی دادگای باڵای فیدڕاڵییەوە بڵاوکردەوە و رایگەیاند، گەیشتنی راستەوخۆی مووچە بۆ مووچەخۆران بابەتێکی زۆر گرنگە و بڕیارەکەی دادگای فیدڕاڵیی جێگەی دڵخۆشییە.
لەبارەی پێکهاتەکانەوە رایگەیاند، کەس بێ ماف نەکراوە بەڵام میکانیزمەکەی گۆڕدراوە و هەڵبژاردن بۆ هەموو خەڵکی هەرێمی کوردستانە بە پێکهاتەکانیشەوە و ئەوان بەشخوراو نابن.
وتیشی، “دڵخۆشیمان بەو بڕیارە بەهۆی ئەوەوەیە کە گێڕانەوەی مافە بۆ مافخوراوان و ئومێدەوارم، هەموو مافەکان بە خاوەن مافەکان بدرێت.”
لە کۆبوونەوەی ئەمڕۆیدا، دادگای فیدڕاڵی لەبارەی یاسای هەڵبژاردنی هەرێمی کوردستانەوە بڕیاریدا و ژمارەی کورسییەکانی پەرلەمانی کوردستانی بۆ 100 کورسی کەمکردەوە، بە پێی بڕیارەکە نابێت هەڵبژاردنی پەرلەمانی کوردستان لە چوار بازنەی هەڵبژاردن کەمتربێت، هاوکات، هەر لەو کۆبوونەوەیەدا دادگای فیدراڵی عێراق، سەرۆک وەزیرانی عێراق و هەرێمی کوردستانی پابەندکردووە بە پێدانی مووچەی مووچەخۆران.
