ئەمشەو، یەکشەممە ڕوبەڕوبوونەوەیەکی گرنگی هەفتەی 14ی خولی پلە یەکی ئەڵمانیا ئەنجامدرا، یانەی بایرن میونشن ڕیمۆنتادایەکی بەهێزی بەرانبەر ماینز تۆمارکرد.
لە ئالیانز ئارینا یانەی بایرن میونشن میوانداری یانەی ماینزی کرد و ئەستێرەکانی هانز فلیک بە ئەنجامی پێنج گۆڵ بەرانبەر بە دوو بردنەوەیان تۆمارکرد.
گۆڵەکانی ماینز لە خولەکەکانی 32 و 45 لەلایەن جۆناسان بۆرکاردت و ئالیکساندەر هاک، گۆڵەکانی بایرنیش لە خولەکی 51 و 56 و 70 و 76 و 83 لەلایەن جۆشوا کیمیچ و لیرۆی سانێ و نیکلاس سولی و ڕۆبێرت لیڤاندۆڤیسکییەوە (دوو گۆڵ) تۆمارکران، سەرەڕای ئەوەی ئەستێرەکانی باڤاری هەوڵی زۆریاندا بە گوشاری توند ئەنجامەکە فراوانتر بکەن، بەڵام ئەنجامەکە لەو ئاستەدا وەستایەوە و یارییەکە بە ئەنجامی (5-2) لە بەرژەوەندی باڤارییەکان کۆتاییهات.
بەپێی ئەنجامە تۆمارکراوەکە، یانەی بایرن میونشن بە 33 خاڵەوە گەڕایەوە پلەی یەکەمی ڕیزبەندی بوندس لیگا، یانەی لایپزیچی ڕکابەریشی بە 31 خاڵ لە پلەی دووەمدا جێگیربوو.
