لە کۆبوونەوەی لەگەڵ نوێنەرانی مامۆستایانی ناڕازی، محەمەد شیاع سودانی جەختیکردەوە، لە هەوڵەکانیان بۆ هەموارکردنەوەی یاسای بودجە و جیاکردنەوەی پرسی مووچە لە پرسە داراییەکانی دیکە.
نووسینگەی محەمەد شیاع سودانی سەرۆک وەزیرانی عێراق بڵاویکردەوە، ئەمڕۆ محەمەد شیاع سودانی سەرۆک وەزیرانی عێراق پێشوازی کرد لە نوێنەری مامۆستایانی هەرێمی کوردستان و لە کۆبوونەوەیەکدا باسیان لە ئامرازەکانی پەرەپێدانی دۆخ و بژێوی مامۆستایان و وانەبێژان کرد.
باسیلەوەشکرد، سەرۆک وەزیرانی عێراق گوێی لە دۆخی دەستەی پەروەردە و فێرکردنی پارێزگاکانی هەرێم و ئەو بەربەست و کێشانەی کە رووبەرووی خزمەتگوزاری خوێندنی هەرێم بووەتەوە گرت، هەروەها باسیان لە ئامرازەکانی پەرەپێدانی دۆخ و بژێوی مامۆستایان و وانەبێژان کرد.
ئاشکراشیکرد، سودانی جەختیکردەوە کە حکومەت لە هەوڵەکانی بۆ هەموارکردنەوەی یاسای بودجە بەردەوامە، ئەویش لە پێناو جیاکردنەوەی دۆسیەی مووچەی فەرمانبەران لەو ئاڵۆزییانەی لە دۆسیەی دارایی نێوان هەرێم و بەغداد هەیە و لەگەڵ لیژنەی دارایی لە کارکردن بەردەوام دەبن بۆ دابینکردنی موچەی فەرمانبەرانی هەرێم.
