مەکتەبی سیاسیی یەکێتی رایدەگەیەنێت، سەری رێز و وەفا بۆ ئەو شەهیدانە دادەنەوێنین کە لەپێناو شەکانەوەی ئاڵای كوردستاندا گیانی خۆیان سپارد.
مەکتەبی سیاسیی یەکێتیی نیشتمانیی کوردستان لە پەیامێکدا بەبۆنەی رۆژی ئاڵای کوردستانەوە رایگەیاند، “لەم رۆژە شكۆمەندە سەری رێز و وەفا دادەنوێنین لە ئاست گلكۆی هەموو شەهیدانی كورد و كوردستان، ئەوانەی لەپێناو بەرز راگرتنی ئەم ئاڵا پیرۆزە گیانی خۆیان كردە قوربانی، سڵاوی ئەمەك و وەفاداری دەنێرین بۆ هەموو پێشمەرگەی كوردستان و زیندانی سیاسی و تێكۆشەرانی كوردستان”.
لە پەیامەکەدا هاتووە، “لە پێناو شەكانەوەی ئەم ئاڵایە، كە هێمای خۆڕاگری و یەكێتیی گەلەكەمانە، پێویستە هەموو لایەنە سیاسیەكان و خەڵكی كوردستان لەدەوری ئامانجە باڵاكان و بەرژەوەندییە گشتیەكان هاودەنگ و هاوهەڵویستن بن، تا بە یەكێتی و یەكگرتوویی پارێزگاری لە ئەزمون و قەوارەی هەرێمی كوردستان بكەین”.
رۆژی 17ی کانونی یەکەمی هەموو ساڵێک وەک رۆژی ئاڵای کوردستان دیاریکراوە، ساڵانە لەم رۆژەدا لەسەرجەم ناوچەکانی هەرێمی کوردستان ئەو رۆژە بەرز رادەگیرێت و چەندین چالاکی جۆراوجۆر بەڕێوەدەچێت.
