سەرۆکی دەستەی راگەیاندن و پەیوەندییەکان لە کۆمسیۆنی هەڵبژاردنەکان ئاماژە بەوە دەکات، “ژوورێکی ئۆپەراسیۆن پێکهێنراوە کە بەرپرسیارێتی بەدواداچوون و چاودێریکردنی میدیاکان لە ئەستۆ دەگرێت لە کاتی راگرتنی بانگەشەی هەڵبژاردن”.
عەلی موئەیەد، سەرۆکی دەستەی راگەیاندن و پەیوەندییەکان لە کۆمسیۆنی باڵای سەربەخۆی هەڵبژاردنەکانی عێراق لە راگەیەندراوێکدا داوای لە سەرجەم دامودەزگاکانی ڕاگەیاندن دەکات کە رۆڵی نیشتمانی خۆیان بگێڕن لە پاڵپشتیکردنی پڕۆسەی هەڵبژاردن و بەهێزکردنی دیموکراسی لە وڵاتدا.
دەشڵێت، “چەند کاتژمێرێک پێش راگرتنی بانگەشەی هەڵبژاردن کە لە کاتژمێر شەشی بەیانی رۆژی هەینی دەستپێدەکات، کۆمسیۆن ژوورێکی ئۆپەراسیۆنی ناوەندی پێکهێناوە کە بەرپرسیاردەبن لە بەدواداچوون و چاودێریکردنی میدیاکان بۆ دڵنیابوونەوە لە پابەندبوونیان بەو یاسا و ڕێنماییانەی کە لە رۆژانی دەنگدانی تایبەت و گشتیدا کاری پێدەکرێت”.
ئەو سەرۆکەی دەستەی راگەیاندن و پەیوەندییەکان جەختی لەوەش کردووەتەوە، “میدیاکان بەرپرسیارێتی نیشتمانی و کۆمەڵایەتییان لەسەر شانە بۆ پاڵپشتیکردنی پرۆسەی هەڵبژاردن و رێنوێنیکردنی دەنگدەران لەسەر میکانیزمی هەڵبژاردن و شوێنی دەنگدان”.
