وەزارەتی دارایی هەرێم رایدەگەیەنێت، حكومەتی هەرێم لە ماوەی رابردوودا بە هەماهەنگیی حكومەتی عێراق و لە رێگای لیژنەی دیوانی چاودێریی داراییەوە سەرجەم داتا و ژمارە راستەقینەكانی داهات و باجی ناوخۆی ئاشكراكردووە و زۆرترین چاكسازی لە بواری باجدا كراوە.
بەپێی راگەیەندراوێكی وەزارەتی دارایی هەرێم كە وێنەیەكی دەست تۆڕی میدیایی ئێستا كەوتووە و تێیدا هاتووە، حكومەتی هەرێم لە ماوەی ڕابردوودا، بە هەماهەنگیی حكومەتی فیدراڵیی عێراق و لە رێگای لیژنەی دیوانی چاودێریی دارایی، سەرجەم داتا و ژمارە ڕاستەقینەكانی داهات و باجی ناوخۆی ئاشكراكردووە و ئەو پرسە كۆتایی هاتووە.
هەر لە راگەیەندراوەكەدا هاتووە، ئەو قسانەی بەڕێوەبەری گشتیی پێشووی باجەكان و خانووبەرەی میری، دوورە لە راستییەوە و لە بەرنامەی كارنامەی كابینەی نۆیەم، ئەنجامدانی چاكسازی و شەفافییەت بووە لە سێكتەری باجدا، لەم چاكسازییانەشدا پشكی شێر بەر كۆمپانیا گەورەكان كەوتووە و هەموو ژمارەكانیش بە روونی خراونەتە بەرچاو و لە كابینەی نۆیەمی حكومەتی هەرێمی كوردستاندا زۆرترین چاكسازی لە بواری باجدا كراوە و بە شێوەیەكی روون و شەفاف مامەڵەی لەگەڵدا كراوە.
