بەڕێوەبەرایەتی گشتی کاروباری مین – سلێمانی ڕایگەیاند، ئێوارەی ئەمڕۆ بەهۆی تەقینەوەی مینەوە لە سنوری پێنجوێن شوانێک گیانی لەدەستدا.
بەپێی زانیارییەکانی بەڕێوەبەرایەتی گشتی کاروباری مین ئەو کەسەی مینەکەی پێدا تەقیوەتەوە ناوی “ئیبراهیم عەبدوڵا”یە و تەمەنی 39 ساڵە و خەڵکی شاری سەقزی ڕۆژهەڵاتی کوردستانە.
شوانەکە بەهۆی نەشارەزایی لە جوگرافیای ناوچەکە کەوتووەتە کێڵگەیەکی پیسبوو بە مین و بەهۆیەوە مینێکی “ڤالمارا”ی پێدا تەقیەوەتەوە، سەرەڕای گەیاندنی بە نەخۆشخانە، بەڵام بەهۆی سەختی برینەکەیەوە گیانی لەدەستداوە.
بەپێی زانیارییەکانی بەڕێوەبەرایەتی کاروباری مین شوانەکە خێزاندار بووە و بەمەبەستی لەوەڕاندنی ئاژەڵەکانی چووەتە ئەو شوێنەی کە مینی لێبووە.
