دادگای باڵای هیندستان ئەمڕۆ بڕیاری حکومەتەکەی نارێندرا مودی، سەرۆک وەزیرانی پەسەند کرد بۆ هەڵوەشاندنەوەی ئۆتۆنۆمی بەشێکی ویلایەتی جامو و کشمیر کە زۆرینەی موسڵمانە.
دادگاکە بڕیاریدا لە ساڵی داهاتوودا هەڵبژاردنەکان لەو ویلایەتانە بەڕێوەبچێت و جەختیشی لەوە کردەوە کە دەبێت بە زووترین کات بە ویلایەتەکانی دیکەی هیندستانەوە گرێبدرێن، هەروەها دادگاکە دەڵێت، “ئەو بڕیارەی لە ساڵی 2019 دەرچووە لووتکەی پڕۆسەی یەکگرتنەوەیە و مومارەسەیەکی شەرعی دەسەڵاتە”.
پیشتر لە مانگی ئابی ساڵی 2019 بە فەرمانی سەرۆکایەتی حکومەتی هندستان بڕیاردرا هەموو بڕگەکانی دەستووری ئەو وڵاتە بەسەر ناوچەی جامو و کشمیردا جێبەجیبکرێت، ئەوەش بەو مانایە دێت کە دەستووری جیاوازی ویلایەتی جامو و کشمیر هەڵوەشایەوە و ئێستا یەک دەستوور بۆ هەموو ویلایەتەکانی هیندستان بەکاردەهێندرێت.
