قوباد تاڵەبانی جێگری سەرۆك وەزیرانی هەرێم، بەبۆنەی رۆژی جیهانیی خاوەن پێداویستیی تایبەتەوە لە پەیامێكدا پیرۆزبایی لە ئەنجومەنی خاوەن پێداویستییە تایبەتەكان دەكات و رایدەگەیەنێت، “بە ئەوپەڕی توانامانەوە پشتگیری و پشتیوانتان دەبین بۆ بەدیهێنانی داخوازی و ئامانجەكانتان”.
دەقی پەیامەكەی قوباد تاڵەبانی…
بەڕێزان ئەنجومەنی خاوەن پێداویستییە تایبەتەكان:
بەبۆنەی رۆژی جیهانیی خاوەن پێداویستيی تایبەتەكانەوە، گەرمترین پیرۆزبایی لەئێوە و ھەموو خاوەن پێداویستییە تایبەتەكان دەكەم.
ئێوەی بوێر و پڕ ھیوا بۆ ژیان واتانكردوە توێژێكی خۆشەویست و رێزلێگیراوی كۆمەڵی كوردەواری بن, لەم ساڵیادەدا دووپاتیدەكەینەوە كە ھیچ ئاستەنگێك نابێتە رێگر لەبەردەم ئیرادە و خواستی ئێوەدا، تەنها دەبێت لێتان تێبگەین و دەرگاكان زیاتر بەڕووتاندا واڵا بكەین، چونكە باوەڕی تەواومان بەوە ھەیە كە ھەمووان یەكسانین لەماف و ئەركەكاندا.
بە ئەوپەڕی توانامانەوە پشتگیری و پشتیوانتان دەبین بۆ بەدیهێنانی داخوازی و ئامانجەكانتان.
