وەزیری دەرەوەی ئەمریكا داوا لە حكومەتی عێراق دەكات پابەندی بەڵێنەكانی بێت لە پاراستنی ئەو دامەزراوانەی ئەمریكییەكانی تیایە.
ئەنتۆنی بلینكن، وەزیری دەرەوەی ئەمریكا پەیوەندییەكی تەلەفۆنی لەگەڵ محەمەد شیاع سودانی، سەرۆك وەزیرانی عێراقدا ئەنجامدا، بەپێی راگەیەندراوێكی وەزارەتی دەرەوەی ئەمریكا.
بلینكن رایگەیاند، كاركردن لەگەڵ عێراق و هاوبەشانی دیكە لە ناوچەكەدا دەبێتەهۆی درێژەدان بە هەوڵی دانانی “بنەمای ئاشتییەكی دادپەروەرانە و بەردەوام” لە رۆژهەڵاتی ناوەڕاست.
وەزیری دەرەوە داواشی لە سودانی كرد پابەندی بەڵێنەكان بێت لەبارەی پاراستنی ئەو دامەزراوانەی ئەمریكییەكانی تیایە.
لە دوو مانگی رابردوودا هێرشی سەر هێزەكانی ئەمریكا و هاوپەیمانان لە عێراق و سوریا زیادیانكرد، كە گومان وایە گروپە چەكدارییەكانی نزیك لە ئێران لە پشتیانەوەن.
لە بەرامبەردا هێزەكانی ئەمریكاش چەند هێرشێكی ئاسمانییان بۆ سەر ئەو گروپانە ئەنجامدا.
