سەرۆكی هەرێمی كوردستان سەركۆنەی هێرشەكەی شەوی رابردووی قەزای شارەبان لە پارێزگای دیالە دەكات و دەڵێت، “دەبێت هەموو هێز و توانایەك و بە هاوكاری و هەماهەنگیی زیاتری سوپای عێراق و پێشمەرگە و هێزە ئەمنییەكان و بە پشتگیریی هاوپەیمانیی نێودەوڵەتی، بەرەنگاریان ببینەوە”.
نێچیرڤان بارزانی، سەرۆكی هەرێمی كوردستان ئەمڕۆ هەینی پەیامێكی بڵاوكردەوە و رایگەیاند، بە توندیی سەركۆنەی ئەو هێرشە تیرۆریستییە دەكەین كە شەوی ڕابردوو لە ناوچەی عومرانیەی سنووری قەزای شارەبان لە پارێزگای دیالە ئەنجامدرا و بووە هۆی شەهیدبوونی چەندین هاوڵاتی و برینداربوونی ژمارەیەك هاوڵاتی دیكە.
هەر لە پەیامەكەیدا هاتووە، “سەرەخۆشی لە كەسوكاری قوربانییەكان دەكەین هاوخەمیانین، هیوای سەلامەتی و زووچاكبوونەوە بۆ برینداران دەخوازین، نەخۆشخانەكانی هەرێمی كوردستان بۆ هەمو هاوكارییەكی پزیشكی بۆ برینداران و بەركەوتووان، ئامادەن”.
