جێگری سەرۆکی حکومەتی هەرێمی کوردستان رایدەگەیەنێت، “نابێت پەیوەندییمان لەگەڵ بەغداد فەرامۆش بکەین و من هەست دەکەم سزای سیاسی دەدرێین”.
لە میانەی بەشداریکردنی لە کۆڕبەندی ئاشتی و ئاسایشی خۆرهەڵاتی ناوەڕاست، قوباد تاڵەبانی، جێگری سەرۆکی حکومەتی هەرێمی کوردستان ئاماژەی بەوەکرد، “نابێت پەیوەندییمان لەگەڵ بەغداد فەرامۆش بکەین و دەبێت بەهێزی بکەین، هاوکات پێویستە پرسی فێدڕاڵیزم لە عێراق چارەسەر بکرێت”.
ئەوەشی خستەڕوو، “رووداوەکانی ئەم دواییەی عێراق دەرخەری ئەوەن کە کێشەکان سیاسین و من وەکو کوردێک هەست دەکەم کە سزای سیاسی دەدرێین، چونکە لە ئێستادا مووچەی فەرمانبەرانمان چەند مانگێکە دواکەوتووە و بایکۆت لە بەشێکی کوردستان بەردەوامە”.
جەختی لەوەش کردەوە، “کوردستان پێویستی بە دەستوورە، بەڵام دەستوور کێشە سەرەکیەکان لەگەڵ بەغداد چارەسەر ناکات وەکو پرسە گرنگەکانی بودجە و مووچە کە بوونەتە کێشەی گەورە لە هەرێم، هاوکات بەبێ چارەسەرکردنی پرسی فێدڕالیزم پرسی دەستووری کوردستانیش چارەسەر نابێ و ئەم کێشانە پێکەوە بەستراون”.
قوباد تاڵەبانی دەشڵێت، “دامەزراندنی ئەنجومەنی فیدراڵی دەبێتە هۆی بوونی هاوسەنگی لەنێوان پێکهاتەکانی عێراقدا، بەبێ ئەنجومەنی فیدراڵیش دەکرێت سیستمی فیدڕاڵیزم لە عێراق جێبەجێبکرێت و پێویستە گفتوگۆی راستگۆیانە لەبارەی داهاتووی عێراقەوە هەبێت”.
