پۆلیسی سلێمانی رایدەگەیەنێت سێ تۆمەتباریان دەستگیرکردووە کە لەڕێگەی یارییە ئەلیكترۆنییەكانەوە بڕە پارەیەکی زۆریان لە هاووڵاتییەک سەندووە.
بەڕێوەبەرایەتیی پۆلیسی سلێمانی لە راگەیەندراوێکدا ئاماژە بەوە دەکات، “دوای ئەوەی هاوڵاتییەك سكاڵای تۆماركرد كەبڕێك پارە لەناو ماڵەكەیدا دیار نەماوە، مەفرەزەكانی پۆلیس لێكۆڵینەوە و بەدواداچوونەكانیان دەسپێكرد، سەرەنجام دەركەوت كە باندێكی سێ كەسی لەژێر فشار و هەڕەشەدا یەكێكیان لە ئەندامانی ئەو ماڵە كە نەوجەوانە، ناچاركردووە كەبڕی 52 ملیۆن دیناریان لەماوەی دوو ساڵدا پێبدات، دواتر داوای بڕێك پارەی تریان لێكردووە و ناوی هێزە ئەمنییەكانیان بەكارهێناوە بۆ ترساندنی”.
ئەوەشی خستۆتەڕوو، “دوای وەرگرتنی بڕیاری دادوەر و لێكۆڵینەوە و بەدواداچوونەكانی پۆلیس، توانرا لەلایەن نووسینگەی كوردساتی بەشی پۆلیسی نەهێشتنی تاوانەوە سێ تۆمەتبار بدۆزرێنەوە و دەستگیربكرێن كە وەك باند كارییان كردووە و لەكاتی دەستگیردنیشیاندا، دەستیگیرا بەسەر ئۆتۆمبێلێكی بێسەرەتا و لاپتۆپێك و چەند موبایلێك”.
لەبارەی رێکارەکانەوە پۆلیسی سلێمانی دەڵێت، “ئێستا تۆمەتباران بە بڕیاری دادوەر و بەپێی ماددەی 452 لەیاسای سزادان راگیراون و لێكۆڵینەوە لەگەڵیان بەردەوامە”.
