وەزیری پەروەردەی هەرێم رایگەیاند، دەبێت یەکشەممەی داهاتوو پرۆسەی خوێندن لە سنووری سلێمانی و هەڵەبجە و گەرمیان دەستپێبکاتەوە و بۆ ئەو مەبەستەش دەسەڵاتی تەواو دەدرێت بە بەڕێوەبەرە گشتییەکان.
ئالان حەمەسەعید وەزیری پەروەردەی هەرێم لە کۆنگرەیەکی رۆژنامەوانیدا رایگەیاند، “مووچە مافی مامۆستایان و فەرمانبەرانە و باوەڕی تەواومان پێیەتی، بەڵام ئێمە دڵمان لای مامۆستایان و خوێندکارەکانیشمانە، دەبێت هەموومان ئەوە بزانین ئەم دۆخە دۆخی گشتییە، هیچ کایەیەک دەوامی رانەگرتووە تا وەزارەتی پەروەردە دەوام رابگرێت”.
ئاماژەی بەوەشکرد، “ئەمڕۆ فەرمانێکی وزاری دەردەکەین، پێویستە رۆژی یەکشەممە دەوامی خوێندنگەکان دەستپێبکات و دەسەڵاتی ئیداری دەدەین بەسەرجەم بەڕێوەبەرە گشتییەکان”.
ئاشکراشیکرد، “هەموو لایەک دەبێت بزانین، دوو مووچە و سێ مووچە لە بەغدادەوە نەهاتووە تا ئێمە دابەشمان نەکردبێت، راستگۆیانە پێتان بڵێم دۆخی خوێندن لەو شوێنانەی بایکۆتی دەوام کراوە لە مەترسیدایە”.
