وەزیری سەرچاوەکانی ئاوی عێراق رایگەیاند، کۆگاکردنی ئاو لە بەنداوەکاندا لە باشترین ئاستیدایە و بڕی ئەو ئاوەی تێیاندایە زیاترە لەو بڕەی کە بۆ بەکارهێنانی کشتوکاڵ پێویستە.
عەون زیاب، وەزیری سەرچاوەکانی ئاوی عێراق لە لێدوانێکیدا ئەوەی خستەڕوو، ”یەدەگی ئاو لە وڵاتدا لە ئاستێکی باشدایە و بە لەبەرچاوگرتنی ئەوەی لە سەرەتای وەرزی دروێنەکردنداین، هاوکات بڕی ئەو ئاوەی لە بەنداوەکاندایە زیاترە لەو بڕەی کە بۆ کشتوکاڵکردن پێویستە”.
ئاماژەی بەوەشکردووە، ”بەنداوی دەربەندیخان نزیکە لە پڕبوون لە کاتێکدا لە چەند ساڵی رابردوودا بە وشکەساڵییەکی سەختدا تێپەڕبوو، هاوکات بەنداوی حەمرین کە بەرپرسە لە دابینکردنی ئاوی ئاودێری بۆ ناوچەی دیالە، ئێستا لە باشترین بارودۆخدایە”.
دەشڵێت، ”وەزارەت بەپێی پلانێکی دروست کاردەکات بۆ دابەشکردنی ئاو بۆ ئەوەی ئەگەر لە ساڵانی داهاتوودا وشکەساڵی رووبدات بتواندرێت رووبەڕووی ببینەوە و پێویستە گرنگییەکی زۆریش بە کۆگاکردن بدەین”.
