ئەندامێكی ئەنجومەنی نوێنەرانی عێراق رایدەگەیەنێت، حكومەتی هەرێم چاوی لەوەیە ئەمساڵ قەرزێكی دیكە لە عێراق وەربگرێت، بەڵام چارەنووسی دوو مووچەی ئەمساڵ تائێستا نادیارە.
سۆران عومەر ئەندامی ئەنجومەنی نوێنەرانی عێراق لە دیدارێكی تەلەفزیۆنیدا رایگەیاند، بەپێی ئەو وردبینییەی لە لیستی مووچەخۆراندا هەیە و دیوانی چاودێریی دارایی عێراقیش بەشداربووە لە پڕۆسەكەدا یەك ملیۆن و 255 هەزار مووچەخۆر لە هەرێمی كوردستان هەن كە دەبێت حكومەتی عێراق مامەڵە لەگەڵ ئەو ژمارەیەدا بكات.
راشیگەیاند، ئەگەر مووچەی مووچەخۆرانی هەرێم بەپێی یاسا بدرێت دەبێت مووچەی خانەنشینان زیادبكرێت و چارەسەری گرفتی وانەبێژان و یەكەمەكان بكرێت و دابمەزرێن.
ئەو پەرلەمانتارە پێیوایە حكومەتی هەرێم ئەمساڵ سێ 700 ملیار دیناری بۆ شەش مانگی كۆتایی ساڵ بە قەرز وەردەگرێت و چاوی لەوەیە قەرزێكی دیكە لە عێراق وەربگرێت، بەڵام گرفتەكە لەوەدایە ئەگەر قەرزێكی دیكەش وەربگرێت مووچەی دوو مانگی ئەمساڵ تائێستا چارەنووسی نادیارە.
