توركیا نووسراوی فەرمی ئاراستەی حكومەتی عێراق كردووە كە ئامادەیی خۆی دەربڕیوە بۆ دەستپێكردنەوەی هەناردەی نەوتی هەرێمی كوردستان.
ماڵپەری عێراق ئۆیل ریپۆڕت بڵاویكردووەتەوە، حكومەتی توركیا نووسراوێكی لە 2ی تشرینی یەكەمی ئەمساڵدا ئاڕاستەی عێراق كردووە و تێیدا ئاماژەی بۆ ئەوە كردووە، بۆریی نەوت ئامادەیە بۆ دەستپێكردنەوەی هەناردەی نەوت كە رۆژانە دەتوانرێت 475 ھەزار بەرمیل نەوت لە رێگای بۆرییەوە ھەناردە بكرێت.
وەكو ماڵپەڕەكە ئاماژەی پێكردووە، حكومەتی توركیا لە نووسراوەكەیدا كە ئاراستەی حكومەتی عێراقی كردووە دەڵێت، “ئاگادارتان دەكەینەوە كە بۆریی گواستنەوەی نەوت لە خاكی توركیا ئامادەیە و عێراق لە 4ی تشرینی یەكەمی ئەمساڵەوە دەتوانێت ھەناردەی نەوت دەستپێبكاتەوە.
لە 25ی ئازاری ئەمساڵەوە هەناردەی نەوتی هەرێم بە بڕیارێكی دادگای نێودەوڵەتیی پاریس هەناردەی نەوتی هەرێم راگیراوە و تائێستا بەغداد و ئەنكەرە لەسەر دەستپێكردنەوەی هەناردەی نەوتی هەرێم نەگەیشتوونەتە رێككەوتن و وەكو ئەوەی بڵاوكراوەتەوە بەهۆی راگرتنی هەناردەی نەوتەوە هەرێم 7 ملیار دۆلار زیانی بەركەوتووە.
