دیوانی چاودێریی دارایی عێراق لیژنەیەكی 15 كەسی بۆ وردبینی لە داهات و خەرجیی هەرێم پێكدەهێنێت و داوای رەزامەندیی سەرۆك وەزیران بۆ رەوانەكردنیان دەكات.
بەپێی نووسراوێك كە بە واژووی عامر سوبحی خەڵەف، سەرۆكی دیوانی چاودێریی دارایی عێراق بە ژمارە (21900) لە رۆژی پێنجشەممە 15ی ئاب دەرچووە و ئاراستەی محەمەد شیاع سودانی، سەرۆك وەزیرانی عێراق كراوە، تیایدا داوای ناردن (ئیفاد)ی لیژنەیەكی 15 كەسی دەكات بۆ هەرێمی كوردستان بەمەبەستی وردبینیکردن لە لیستی مووچە و خەرجی و داهاتەکانی هەرێم بەپێی یاسای بودجەی گشتیی عێراق.
لیژنەكە رۆژێك پێشتر بۆ هەمان مەبەست و بە فەرمانی دیوانی چاودێریی دارایی پێكهێنراوە.
سەرلەنوێ وردبینیكردن لە داهات و خەرجییەكانی هەرێم لەكاتێكدایە بەپێی وتەی پەرلەمانتارانی لیژنەی دارایی ئەنجومەنی نوێنەران چاوەڕوان دەكرا رۆژانی چوارشەممە و پێنجشەممە مووچەی مانگی تەمموزی مووچەخۆرانی هەرێم لە بەغدادەوە رەوانە بكرێت.
ئەمەش لەكاتێكدایە ئەمڕۆ 16 رۆژی مانگی ئاب تێدەپەڕێت و هێشتا مووچەخۆران مووچەی مانگی رابردوویان وەرنەگرتووە.
