بافڵ جەلال تاڵەبانی سەرۆكی یەكێتیی نیشتمانیی كوردستان لە دیداری مێری لە شاری هەولێرەوە رایگەیاند دەیەوێت یەكێتی بگۆڕێت و یەكێتی بكاتە حزبێكی “مێریتۆكراسی”، بەڵام ئاخۆ دەبێت مەبەستی سەرۆك بافڵ لەو چەمكە چی بێت؟
مێریتۆكراسی، سیستمێكی سیاسییە كە تێیدا دەسەڵاتی سیاسی لەسەر بنەمای لێهاتوویی و هەوڵدان و دەسكەوتی تاكەكان دیاریدەكرێت، نەك سامان و چینی كۆمەڵایەتی، هەرچەندە مێریتۆكراسی وەك چەمك چەندین سەدە هەیە، بەڵام لە ساڵی 1958 وەكو دەستەواژە لەلایەن (مایكڵ دانلوپ) لە وتارێكیدا بەناوی سەرهەڵدانی حكومی مێریتۆكراسی ناسێندرا.
لە زۆرینەی پێناسەكاندا حوكمی مێریتۆكراسی بەو حوكمە وەسفكراوە كە پشت بە تاقیكردنەوەی لێهاتوویی و توانا دەبەسترێت تێیدا، ئەویش لە رێگای پشتبەستن بە پشكنینی رێژەیی زیرەكیی تاك لە دامودەزگا حكومییەكان و لە دامەزراوە ئیدارییەكانشدا سیستمێكە پێشكەوتن تێیدا بەستراوەتەوە بە ئەدای كاركردن و زیرەكیی بڕوانامە و ئاستی خوێندن و هەڵسەنگاندن و تاقیكردنەوەكان.
لە مانا گشتگیرییەكەشیدا، مێریتۆكراسی ئاماژەیە بۆ هەر جۆرە هەڵسەنگاندنێك كە لەسەر بنەمای دەستكەوتی بەدیهێنراوبێت.
بەدەر لەمانەش لە سیستمی مێریتۆكراسیدا تەنها زیرەكی ئاستی خوێندن و لێهاتوویی گرنگی پێنادرێت، بەڵكو توانای جەستەیی و ئەخلاقیاتی كاریش گرنگی خۆیان هەیە.
دەوترێت بۆ یەكەمجار لە چینی كۆن كار بەم سیستمە كراوە و مێژووەكەی دەگەڕێتە بۆ سەدەی شەشی پێش زایین ئەو كاتەی فەیلەسوفیی چینی كۆنفوشیۆس وتی، “دەبێت حاكمەكان بە گوێرەی مێرتیۆكراسی فەرمانڕەوایی بكەن نەك بە میراتگریی بۆیان بمێنێتەوە”.
ئەوەبوو تاقیكردنەوەی ئیمپراتۆڕییەتی هاتەئاراوە و ئەو كەسانەی سیستمی ئیدارییان بەڕێوەدەبرد هەڵسەنگاندنیان بۆ كرا.
دواتر بیرۆكەی مێریتۆكراسی بە بەریتانیا و ئەمریكا و ئەوروپادا بڵابووەوە و وەك جێگرەی سیستمی كۆنی ئەوروپا و رۆژئاوا پشتی پێبەسترا.
